TADDS

SUNNUDAGSHUGLEIÐING

2009-10-04T20:08:00.001Z

Það skiptir miklu máli að ungliðasamtök stjórnmálaflokkanna séu vel skipuð, því þar er grunnur lagður að pólitísku starfi framtíðarinnar. Ungir Sjálfstæðismenn völdu sér nýlega foringja og heitir sá Ólafur Örn Nielsen.

Það vill svo skemmtilega til að TADDS hefur einu sinni hitt Ólaf og lék þá með honum golfhring austur á Hellu. Þetta er kornungur maður, ríflega tvítugur, harðduglegur og vann fyrir sér meðfram náminu sem einskonar tölvugúrú á mogganum. Hann er háttvís, fastur fyrir, hæglátur, vel máli farinn, hugsar öll mál út í æsar, rökvís og hefur skýra og afar skilmerkilega afstöðu. Ekki fóru skoðanir vefritsins og Ólafs saman í mörgum veigamiklum málum, en TADDS gladdist mjög að eiga dagstund með svo vel gefnum, háttvísum og vönduðum æskumanni. Allt í fari þessa drengs bar vitni um góðan stofn og gott uppeldi.

Hjá Ólafi fara líka saman atgervin andleg og líkamleg, því hann er tveir metrar á hæð, afrenndur að afli og jafnoki Gunnars á Hlíðarenda að fræknleik. Hann er prúður leikmaður á golfvelli, dræfar firnalangt og járnahöggin eru há, löng og hárnákvæm. TADDS beið ósigur en þetta var góður dagur. Megi Drottinn gefa oss fleiri slíka æskumenn og þá þurfum við ekki að kvíða neinu, Íslendingar.

FRÉTT: ÖGMUNDUR JÓNASSON GENGUR TIL LIÐS VIÐ STORMSVEIT TADDS

2009-09-30T14:22:00.004Z

Ögmundur Jónasson sem sagði af sér embætti heilbrigðisráðherra fyrr í dag hefur samkvæmt öruggum heimildum ÍTAR-TADDS fréttastofunar þegið boð kristilega vefritsins TADDS um að stýra nýstofnaða flugdeild stormsveita vefritsins.

Í samtali við fréttaritara ÍTAR-TADDS kvaðst Ögmundur feginn að vera laus undan oki ofurlaunakrafna íslenskra lækna og hugmynda um að græða mongós á erlendum aðilum. Ögmundur kvast jafnframt spenntur fyrir því að fá að stýra jafn vel vopnum búnum flugvélum og þeim sem um ræðir.

Seint í gærkvöldi náðust fyrir tilstuðlan Ögmundar samningar á milli stormsveita kristilega vefritisins og sómalskra vígamanna á 8 F-14 orrustuflugvélum og 6 B-52 sprengjuvélum. Hugmyndina á bak við þessum kaupum á Þráinn Bertelsson sem nýlega gekk í raðir TADDS. Ætlunin er að nota vélarnar til að granda öllum Fokker flugvélum sem fljúga of nálægt TADDS kafbátnum en eins og allir lesendur TADDS vita fara ritstjórnarfundir vefritsins fram í rússneskum kafbáti.

Ólafur F. kjörinn formaður UngSjalla

2009-09-28T15:03:00.005Z

Sambandsþing ungra Sjalla lauk um helgina með því að Ólafur Fokker Friendship Níelsen var kjörinn formaður til næstu tveggja ára. Ólafur F. eins og gárungar kalla hann eftir atburði helgarinnar ákvað á fylleríi aðfararnótt sunnudags að bjóða sig fram til formanns og hringdi þá í nokkra félaga sína sem voru að fá sér í glas á Garðatorgi í Garðabæ. Þeim var öllum smalað upp í rútu og settir í flug beint vestur á firði, en enginn þeirra hafði áður farið lengra en upp í Fossvog.

Bæjarstjóri Garðabæjar hefur lýst yfir þriggja daga bæjarfögnuði og munu hinar vösku hetjur fljúga lágflugi á Fokkernum yfir Flataskóla í fyrramálið kl. 9. Þaðan munu þeir svo stökkva út í fallhlífum, leiðtogar Garðabæjarklíkunnar, siðfræðingur Íslands, Stefán E. Stefánsson, Dabbi rauði og Óli F(okker).

Er gert ráð fyrir því að Garðbæingurinn og línumaðurinn frægi Skúli Gunnsteinsson muni halda tölu af þessu tilefni. Þá munu hetjurnar hlaupa heiðurshring um Arnarnesið og enda á því að fá sér pylsu og kók í Bitabæ við Hafnarfjarðarveg. Þar geta allir fengið eiginhandaráritanir og eru allir velkomnir meðan húsrúm leyfir.

BLOGGARI: Davíð Oddsson kveikti í Höfða

2009-09-26T13:12:00.001Z

Ónafngreindur bloggari telur að Davíð Oddsson ritstjóri kristilega vefritsins TADDS hafi kveikt í Höfða í gær. Bloggarinn lét hafa ummælin eftir sér í kommentakerfi Egils Helgasonar stjórnmálaskýranda um þrjúleytið í nótt. Bloggarinn sem eitt sinn kaus Þjóðvaka, svo húmanista, þvínæst Borgarahreyfinguna og fylgir nú Þráni Bertelssyni að málum en telur sig í raun og veru neoanarkosyndikalista að eigin sögn hefur öruggar heimildir fyrir þessari fullyrðingu úr innsta kjarna bloggheima. Ástæðan fyrir íkveikjunni samkvæmt ónafngreinda bloggaranum á að vera óánægja Davíðs með niðurstöðu leiðtogafundar Ronald Reagans og Mikhails Gorbachev í Höfða árið 1986. Annar ónafngreindur bloggari telur hins vegar að um síðbúna stuðningsyfirlýsingu við Varsjárbandalagið sé um að ræða og að Baugsveldið og Samfylkingin standi í sameiningu á bak við íkveikjuna en ekki Davíð Oddsson ritstjóri kristilega vefritsins TADDS.

Í samtali við ÍTAR-TADDS fréttastofuna sagði Davíð Oddsson að ummæli ónafngreindu bloggaranna dæmdu sig sjálf. Þrátt fyrir ítrekaðar tilraunir hefur ÍTAR-TADDS fréttastofan ekki fengið viðbrögð Egils Helgasonar og Hönnu Láru við þessum fregnum.

VERITAS VOS LIBERABIT - VERITADDS VOS LIBERABIT

Benni Ólsari ráðinn ritstjóri Lögbirtingarblaðsins

2009-09-24T20:39:00.004Z

Þau miklu tíðindi urðu i íslenskri blaðaútgáfu í dag að Benedikt Ólafsson (öðru nafni Benni Ólsari) hefði verið ráðinn ritstjóri Lögbirtingarblaðsins. Í kjölfarið ráðningarinnar var öllum starfsmönnum blaðsins sagt upp nema Sigfríði Vilhjálmsdóttur sem mun áfram svara í símann nú sem endranær.

Stjórn Blaðamannafélags Íslands mun hittast á fundi í dag og ræða málið en formaður félagsins hefur sagt við fjölmiðla að ráðning Benedikts sé aðför að tjáningarfrelsinu. Benedikt hefur hins svarað fullum hálsi og sagt um ráðningu sína: "Það eru lög í þessu landi sko", en þar hefur Benedikt vitaskuld lög að mæla.

Búist er við að ritstjórnarstefna Lögbirtingarblaðsins munu taka miklum stakkaskiptum við þessi ritstjóraskipti. Þannig er allt eins líklegt að látið verði af stuðningi blaðsins við veru Íslands í Norðurheimskautsráðinu og að lagst verði alfarið gegn orgelkaupum í nýbyggrði kirkju í Trékyllisvík á Ströndun, en þetta á þó allt eftir að koma í ljós eins og þar stendur.

Í samtali við ITAR-TADDS fréttastofuna í dag sagði Benedikt að von væri á töluverðum áherslubreytingum hjá Lögbirtingarblaðinu. Þannig væri ætlunin að poppa aðeins upp tilkynningar sýslumanna um nauðungaruppboð og aðrir tilkynningar hins opinbera, létta á málfari og segja gamansögur. Til dæmis yrði tekinn upp dálkurinn "Embættismaður vikunnar" og þar teknir tali embættismenn sem taldir eru skara fram úr. Þá verður einnig litið í pokahornið og birtar gamlar auglýsingar, t.d. um leyfisveitingar á 6. áratugnum og gengisfellingar á 8. áratugnum.

Að sögn Vilhjálms Hans Vilhjálmssonar útgefanda Lögbirtingarblaðsins er fyrirhuguð sameining við Stjórnartíðindi, og að gefið verði út nýtt sameinað blað: Lögbirtingur / Stjórnartíðindi (sbr. Dagblaðið Vísir) á haustmánuðum.

FRÉTT: Davíð verður ekki næsti ritstjóri Morgunblaðsins

2009-09-22T19:52:00.005Z

Davíð Oddsson fyrrverandi forsætisráðherra og seðlabankastjóri verður ekki næsti ritstjóri Morgunblaðsins. Þrálátur orðrómur hefur verið uppi um að Davíð verði næsti ritstjóri blaðsins. Davíð þvertekur hins vegar fyrir þetta í samtali við fréttaritara Ítar-TADDS. Líkurnar á því að 330 ml. diet kók baukur verði ráðinn ritstjóri verða því sífellt meiri og meiri.

Davíð þvertekur fyrir það í svari sínu við fyrirspurn fréttaritara TADDS um hvort hann taki við ritstjórastöðunni af Ólafi Stephensen. Svar hans er stutt og laggott „nei segi ég og skrifa, ég er samningsbundinn kristilega vefritinu TADDS, miðlinum sem sigrar“ þegar hann er spurður hvort hann muni taka við stöðunni.

Líklegt þykir að eigendur Morgunblaðsins tilkynni um nýjan ritstjóra blaðsins síðar í vikunni. Stjórn Árvakurs mun funda um málið klukkan tíu í kvöld og verður ákvörðunin um næsta ritstjóra blaðsins væntanlega rædd þar.

Frétt: Þráinn Bertelsson til TADDS

2009-09-21T19:33:00.001Z

Í kjölfar ráðningar TADDS á Davíð Oddssyni sem ritstjóra hefur hinn landlausi Þráinn Bertelsson gengið til liðs við stjórnmálaarm hins kristilega vefrits. Í samtali við þingfréttaritara TADDS kvaðst Þráinn feginn því að vera loksins kominn í skjól eftir að hafa verið terra nullius í stjórnmálaheiminum.

Þórsarinn var hins vegar ómyrkur í máli í garði síns fyrrum flokksfélaga. „Í nafni borgaralegs lýðræðis, gegnsæis og kúltiveraðrar réttlætskenndar minnar þá finnst mér þessi ákvörðun Þráins út í bláinn. Ég skil bara hreinlega ekki hvers vegna nokkur maður vill ganga til liðs við stjórnmálaarm kristilegra kjötiðnaðarmanna sem virðist fyrst og fremst vinna að framgangi hugmyndafræði Margrétar TADDSer.“

Formlega verður gengið frá aðild Þráins að stjórnmálaarmi kristilega vefritsins TADDS á miðvikudaginn næstkomandi.

FRÉTT: Davíð Oddsson verður ritstjóri TADDS

2009-09-21T19:21:00.005Z

Davíð Oddsson, fyrrverandi forsætisráðherra og seðlabankastjóri, verður ritstjóri kristilega vefritsins TADDS. Ákvörðun um þetta verður væntanlega tekin formlega á ritstjórnarfundi TADDS, í sláturhúsi Kjarnafæðis, á miðvikudaginn.

Dagsetning ritstjórnarfundar TADDS fékkst ekki staðfest hjá salat- og sósudeild Kjarnafæðis í dag. Ritstjórn hins kristilega miðils vill ekki tjá sig um ráðningu ritstjóra.

Á stjórnarfundinum verða að líkindum teknar ákvarðnir um útrás í útgáfu og rekstri. Líklegt er að ritstjórnarmeðlimum TADDS verði fjölgað. Þá er rætt um að fjölga útgáfudögum blaðsins um sjö.

Davíð Oddsson hefur áður verið orðaður við ritstjórastól hjá TADDS. Hann var tónlistarrýnir hins kristilega miðils 2004 til 2005 og hefur alla tíð sýnt TADDS mikinn áhuga.

Verði gengið frá ráðningu Davíðs á miðvikudaginn mun hann koma til starfa á fimmtudaginn.

Einhverjar tilfærslur verða að líkindum á störfum á ritstjórninni í tengslum við ráðningu Davíðs eða í kjölfarið.

TADDARADDATADDS!!!!

2009-09-20T19:22:00.005Z

Í ljósi aðstæðna í íslensku þjóðfélagi hefur kristilega vefritið TADDS, veftímarit um taðreykt matvæli og Margréti TADDSer, ákveðið að snúa aftur. Á þeim umrótatímum sem við lifum á telur ritstjórn veftímaritsins, sem saman stendur af 12 kjötiðnaðarmönnum, að mikilvægt sé að rödd kristilegra kjötiðnaðarmanna sem áhugasamir eru um Margréti Taddser heyrist sem víðast.

MUTANTUR OMNIA NOS ES MUTAMUR IN ILLIS

TADDS HÆTTIR

2007-09-27T23:52:00.000Z